انتشر يوم امس فيديو لأسرة في منيا القمح، تنقل فرش عروس بـ "عربات كارو" بدل السيارات بسبب غلاء أسعار البنزين. وانهالت زغاريد الفرحة والتعليقات الإيجابية الضاحكة ومنها: "مالو يا خويا كل شيء مكتوب.. يا تره هنرجع للشبرايه والجمل في زفه بتاعت العروسه والحصان للعريس ويلف البلد ويخش في اوضه مع العيله".. و ههههههههههههه ايه الحلاوة دي ايه يابني الحلاوة دي" و.. ايه ده ابني الحاجات اللي عندكو دي؟ عقبال فرشك اسطا وهبقي ازينهملك كده ع حسابي".... و "هههههههههههه انا عاوز العفش يجيلي كدة مليش فيه اي كميه الحمير دي اتصرفي".. و" الراجل ده... هايرجعنا لورا لحد مايخلينا نخبز بالجله وكمان هايغلي الجله ههههه".. و"الناس حالهم بقى طين! يعني يدفع في النقلة الوحدة لكل عربية ١٠٠ ولا يجيب كاروا الجيران بحزمتين برسيم يخليهم معاه ٢٤ ساعة".. و "مش كنت لسه بقولك بيعو العربيه وهاتو حمار؟ إستلم يا عم لا تفتكرنى بهرج".. و"اتفرج يا صاحبي عشان نعملك كدا واعمل لها اشاره خليها تتفرج.. حاجه فل والله"..

وتساءل البعض قائلا: "اللي خلاهم يجيبو كل العفش مخلهمش يدفعو 200ج لنص نقل يوصلهم؟؟" و"لا يصح إلا الصحيح والناس العلى اد حالهم هيجيبو منين عربيات جامبو و مين يحاسبلهم عليها؟".. و "معاهم فلوس يجهزوا للعروسه بس مش معاهم اجره العربيه؟".. و"سبحان الله يتدفعوا فى ركنه العربية عشرة و عشرين جنية وزعلانين علشان جنية و اثنين؟".. و " يعني العروسه جايبه جهاز ب 150 الف جنيه وهتيجي ع العربيات متجبهاش؟ ايه الاوفر ده؟"..

وأضاف آحرون: "مصر الدولة الوحيدة في العالم بتتمنى أن التاريخ يرجع بيها لورا ماضيها احسن من الحاضر والمستقبل".. و "نرجع للعيشه البسيطه افضل من الشعور بالقهر الي بيزيد جوانا يوم بعد يوم ؛ الا اذا ربنا جاب لنا حاكم يكون همه رعايه مصالح البسطاء.".. و " والله العظيم اجدع خلق الله يا ريتنا كلنا نفكر بنفس المنطق بعيد عن منطق المظاهر والفشخرة الكدابة" و " طب والله شكلهم حلو وفيه فرحه المهم الرضا وربنا يفرح الجميع يااارب".. و " وماله مش عيب ابدا الصراحة راحة احسن فكرة والله لازم نفكر كويس علشان نمشي صح زي الوضع اللي انتوا شوفتو دا اسرع حل والله".. و "والواحد مش عارف ايه القرف ده. كل حاجه غليت. الناس غلابه هتجيب منين تاجير عربيات علشان يشيلو العفش . ربنا يفرجها على الجميع وعلى البلد ويصلح الأحوال".. و "عليكم افاهات يا مصريين .. مصر بخير .. تدافعوا السجائر مئات جنيهات وعاملين زيطة و هلليلة علشان زيادة جنيه".. و "والله ياريتنا نرجع للحياه البدائية من تانى بسيطة وجميلة"

بينما أكد البعض ان الامر لا علاقة له بأسعار البنزين وان هذه هي العادات في الأرياف فقال احدهم: "هذه قرية النعامنه - مركز منيا القمح - محافظة الشرقية وبعيد عن اى اقاويل دي عادات وتقاليد فى قريتنا". وقال آخر: "بطلوا افتراء بقا .. دى عادات وتقاليد .. احنا راضين بس ابعدوا عن طريقنا وبطلوا اثاره للفتن".. وقال ثالث: " هما كده كده بيحبوا ينقلوا العفش بالكارو بتبقي عادة عند ناس كتير خصوصا الأرياف"