خرجت الفنانة عايدة رياض عن صمتها لترد على الجدل الذي أثير بسبب تصريحاتها الأخيرة حول مشاركتها المعتادة في ذبح الأضاحي، بسبب الاختلاف في الديانة كونها مسيحية.

وقالت عايدة رياض في منشور عبر حسابها بموقع "إنستجرام": "انا مسيحية وبحتفل بعيد الأضحى.. أنا مش شايفة أن الموضوع كان مستاهل كل الضجة دي إطلاقا.. كوني مسيحية وبشارك في الاضاحي وباكل فتة وبنعيش اجواء العيد مع بعض ودي حاجة مش بتقلل مني أو حتى بتثير الجدل بالعكس ده شيء محمود جدا".

وأضافت: "الذبح عموما موجود في كل الاديان السماوية وموجود في ديانتنا وبنشترك كلنا وبنضحي وبنتجمع كالعادة وخلي إلى يتكلم يتكلم، وانا متعودة على كدا من زمان وعمر ما حد كان بيسأل على ديانة حد ايه الدين لله والوطن للجميع وكلنا في الآخر مصريين اخوات وأهل وصحاب واحبة ومفيش فرق بينا إطلاقا ولما حد كان بيتكلم كلمة مش كويسة عن الإسلام كنت بطلع ارد بنفسي لأننا واحد يا جماعة مفيش فرق بينا لأننا بنتشارك الوطن إلى بيجمعنا على المحبة والود وطول عمرنا ايد واحدة وهنفضل ايد واحدة ويقول غير كدا دول ناس فاضية". وتابعت: "انا مش عايزة ادخل في جدل مع حد من دول.. يارب دايما متجمعين في الخير ودايما اخوات وأهل وصحاب وجيران وحبايب ودايما ايد واحدة وربنا يخلينا لبعض".